Breaking News

Հայաստանի բանկերը ռուբլով գործարքները չեն սահմանափակում. ՀՀ ԿԲ

Ստեղծված իրավիճակից օգտվելով` Հայաստանի բանկերը էժան ռուբլի են գնում ու թանկ վաճառում։
Հայաստանի բանկերում ռուբլու բոլոր արտարժութային գործարքներն իրականացվում են առանց սահմանափակումների։
«Ոչ մի սահմանափակում չկա, ՀՀ Կենտրոնական բանկը սատարում է ազատ արտարժույթի շուկայի քաղաքականությանը»,- հայտնում է մամուլի ծառայությունը։
Ավելի վաղ «Ադրբեջանի միջազգային բանկ» ԲԲԸ-ն (ABB) սահմանափակել էր ինտերնետ բանկերի միջոցով ռուսական ռուբլու հետ արտարժույթով կանխիկ և անկանխիկ գործարքները: Այս որոշման պատճառն, ըստ այդ երկրի պաշտոնական մեկնաբանության, ռուսական ռուբլու անկայուն փոխարժեքն է։
Նշենք, որ այսօր՝ փետրվարի 28-ին, ռուսական ազգային արժույթի պաշտոնական փոխարժեքը հայկական դրամի նկատմամբ հայաստանյան բանկերում փետրվարի 26-ի համեմատ նվազել է 0,03 դրամով և մնում է միջինը 5,7 դրամի մակարդակում։

Հատկանշական է, որ այսօր առավոտից որոշ բանկերում ռուսական ռուբլու առքի ռեկորդային ցածր մակարդակ է սահմանվել։ Որոշ բանկերում այն կազմում է 2 դրամ 1 ռուբլու դիմաց, իսկ, օրինակ «Զվարթնոց» օդանավակայանի փոխանակման կետում ռուսական 1 ռուբլին գնվում է 1.5 դրամով։
Հետաքրքրական է, որ այս անկման ֆոնին ռուբլու վաճառքի մակարդակը բանկերը շարունակում են հարաբերական բարձր պահել։ Ամենացածր փոխարժեքն այսօր գրանցվել է 5.11 դրամի սահմանում, ամենաբարձրը` 6.5։ Ընդ որում, վաճառքի փոխարժեքը շաբաթ– կիրակի ոչ միայն չի նվազել, այլև ավելացել է 0.01 դրամով։
Ռուսական ռուբլու փոխարժեքը ՀՀ դրամի նկատմամբ հայաստանյան բանկերում 28.02.22-ի դրությամբ — Sputnik Արմենիա, 1920, 28.02.2022
Ռուսական ռուբլու փոխարժեքը ՀՀ դրամի նկատմամբ հայաստանյան բանկերում 28.02.22-ի դրությամբ
© Photo : Screenshot / Rate
Այս կերպ, փաստորեն, ստեղծված իրավիճակից օգտվելով, Հայաստանի բանկերը էժան ռուբլի են գնում ու թանկ վաճառում։
Հիշեցնենք, որ Ուկրաինայում ՌԴ ռազմական հատուկ գործողությունների պատճառով ԵՄ–ն տնտեսական սահմանափակումներ է կիրառել Ռուսաստանի նկատմամբ, որոնց ֆոնին ռուսական արժույթն ու բաժնետոմսերն ամբողջ աշխարհում կտրուկ անկում են գրանցում։
Սահմանափակումների թվում նաև ռուսական բանկերի նկատմամբ պատժամիջոցներն են։ Ֆինանսական կազմակերպությունների արտաքին ակտիվները սառեցվել են, արտաքին փոխանցումները`արգելվել։

Check Also

Ուկրաինայի ԿԲ-ն ՀՀ-ին խնդրել է հրաժարվել ռուսական «Միր» վճարային քարտերից

Ուկրաինայի Կենտրոնական բանկը դիմել է ռուսական «Միր» վճարային համակարգն ընդունող մի շարք երկրների, այդ թվում` …