Breaking News

Բացահայտվել է Ստրադիվարիուսի ջութակների յուրահատուկ հնչողության գաղտնիքը

Գիտնականները բացահայտել են Անտոնիո Ստրադիվարիուսի ջութակների յուրօրինակ հնչողության գաղտնիքը: Այս մասին հաղորդում է Daily Mail պարբերականը: Հետազոտությանը մասնակցել է բիոքիմիկոս և ջութակագործ Ջոզեֆ Նագիվարին, ով առաջինն էր պնդել, որ Ստրադիվարիուսի ընտանիքի ջութակների որակը քիմիական ծագում ունի: Նրա վարկածը հաստատվել է:

Ինչպես պարզել են գիտնականները, գործիքները մակաբույծներից պաշտպանելու համար ջութակների համար նախատեսված փայտը մշակել են պաղլեղներով, բորաքսով, պղնձով, կրաջրով (կալցիումի հիդրօքսիդի լուծույթ) և ցինկով:

Քիմիական մշակումն օգտագործվել է նաև ժամանակի մեկ այլ կրեմոնյան ջութակագործի՝ Ջուզեպպե Գուարներիի կողմից:

«Նոր հետազոտությունը ցույց է տալիս, որ Ստրադիվարիուսը և Գուարներին փայտի մշակման իրենց հատուկ մեթոդն ունեին, որին նրանք, ամենայն հավանականությամբ, մեծ նշանակություն էին տալիս: Նրանք, հավանաբար, հասկացել են, որ իրենց օգտագործած հատուկ աղերը փայտին տալիս են լրացուցիչ մեխանիկական ուժ և ակուստիկ առավելություններ: Նրանք գաղտնի էին պահում իրենց մեթոդները: Այն ժամանակ դեռ արտոնագրեր չկային», – ասում է Նագիվարին:

Նա ընդգծել է, որ այս հարցն ամբողջությամբ հասկանալու համար ավելի շատ հետազոտություններ են անհրաժեշտ:

1in.am

Check Also

Կինը գեղեցկության սրահին դատի է տվել և ստացել 271 հազար դոլար փոխհատուցում

Հնդկաստանում կինը վատ սանրվածքի համար դատի է տվել վարսավիրանոցին և այժմ 271.000 դոլար փոխհատուցում է …