Breaking News

Սողանքներ Լիսկայի ոտքերի տակ

Ավելի քան 10 տարի Սյունիքի մարզն իր բռի մեջ պահած ու երկու անգամ պաշտոնաթող եղած Սուրիկ Խաչատրյանը՝ Լիսկան, քաղաքականության մեջ կենդանության նշույլներ կատարելու փորձեր է իրականացնում: Նա հայտարարել է, որ Գորիսի քաղաքապետի  ընտրությունում չի աջակցի Հանրապետականի 26-ամյա թեկնածու Առուշ Առուշանյանին:

Հիշեցնենք՝ երիտասարդ թեկնածուն առայժմ Գորիսի համայնքի ղեկավարի պաշտոնակատարն է և եթե այստեղ ֆորս մաժորային իրավիճակներ չստեղծվեն, ապա կասկած չկա, որ նա էլ կընտրվի Գորիսի քաղաքապետ: Լիսկայի ու Առուշ Առուշանյանի միջև հսկայական անդունդ կա գոյացած, որը տարիների վաղեմություն ունի: Բոլորի համար պարզ է, որ  Սուրիկ Խաչատրյանը հենց այդպես էլ պետք է ասեր, չնայած այն հանգամանքի, որ արդեն Գորիսում որևէ ազդեցության լծակ չունի և իր աջակցել-չաջակցելու մասին հայտարարությունն ընդամենը սեփական ներկայությունը ցույց տալու փորձ է, քանի որ վարչական ռեսուրսն ամբողջովին գտնվում է Սյունիքի մարզպետ Վահե Հակոբյանի ձեռքում, իսկ «Զանգեզուրի պղնձամոլիբդենային կոմբինատն» յուրաքանչյուր ընտրությանը «սարի պես կանգնած է» ՀՀԿ-ի մեջքին: Իսկ ՀՀԿ-ն պաշտպանում է Առուշ Առուշանյանի թեկնածությունը:

Տարիներ շարունակ Լիսկան պայքարում էր, որ Գորիսի քաղաքապետ կարգվեր իր որդին, հենց այդ նպատակով նա, 2016թ.-ին մարտի 5-ին՝ Վազգեն Սարգսյանի ծննդյան օրը,  Տիգրան Խաչատրյանին հագած-կապած բերեց Երևան ու քաղաքական էլիտայի հետ բարձրացրեց Եռաբլուր.  «Ես եմ ասում, մարդու վրա, որ շատ աչք ա լինում, այդ մարդն արդեն փորձանքների է հանդիպում»,-լրագրողներին նշեց Տիգրան Խաչատրյանը: «Վատ մարդկանց» աչքն այնքան շատ է, որ հիմա 7 կողպեքով փակ է անգամ Գորիսի քաղաքապետարան «մտնելու» կրտսեր Խաչատրյանի հնարավորությունը:

Հիմա, փաստորեն, լիակատար ֆիասկոյի առջև հայտնված Խաչատրյանների համար այս ընտրությունը կլինի նաև մարտահրավեր: Եթե Առուշ Առուշանյանը կանխատեսվածից քիչ կամ վտանգավոր սահմանագծին մոտ ձայներ ստանա, իսկ Սուրիկ Խաչատրյանը բոլոր հնարավոր ու անհնարին միջոցները կգործադրի դրա համար, ապա դա Լիսկայի թիմը կհամարի հաղթանակ՝ հետագայում ՀՀԿ-ից ինչ-որ ակնկալիքներ ունենալու հեռանկարով, հակառակ դեքպում՝ Սուրիկ Խաչատրյանն էլ իրեն էլ չի կարող չհամոզել, որ Սյունիքում իր ոտքերի տակից հողը փախել է:

ArmLife.am 

Check Also

Երեկ Բաքվից վերադարձած ռազմագերիներից մեկը ձերբակալվել է․ ՔԿ

Երեկ Հունգարիայի կառավարության միջնորդությամբ Բաքվից վերադարձած 5 հայ ռազմագերիներից մեկը ձերբակալվել է, նշել է Քննչական …